魔膳廚房 (Closed)

觀塘工廈出咗名多隱世餐廳，但呢間魔膳廚房有大約二百幾好評，而且見到星期六下午係假日自助午餐，每位只係$88，我同女朋友迫不及待衝上去。一如工廠區既餐廳一樣，魔膳廚房面積非常大，樓底亦非常高。牆身掛上一排排嘅酒瓶、得意嘅畫作。整體以暗色為主。呢張dog boss係我最鍾意！自助午餐既選擇多，有女友鍾意嘅瑞士雞翼，肉嫩又入味。仲有我鍾意嘅煙肉芝士焗西蘭花，西蘭花稔軟程度啱啱好，厚厚嘅芝士鋪係西蘭花上面，真係非常正！意粉亦值得推介。意粉係鴨胸蒜香意粉，鴨胸非常大件，煎得非常香，意粉嘅蒜味亦夠，不偏不倚。自助餐有兩款湯選擇，我鍾意飲南瓜湯，女友又鍾意飲羅宋湯，餐廳一次過滿足晒我同女朋友嘅要求。甜品方面，我揀咗兩款迷你酥加麵包布甸，三款味道都唔錯，尤其是吉士忌廉酥，香脆酥皮配上甜甜嘅忌廉，令人有種食完一個再食一個嘅感覺。自助午餐仲附送一杯飲品。我個杯凍玫瑰咖啡嘅造型猶如餐廳嘅名字一樣，俾人一種充滿魔力既感覺。充滿玫瑰味咖啡非常香，又唔會太甜。女友就選擇熱蘋果紅茶，可以幫助消化，我地食食下原來每人都差唔多食咗六七碟大約$200左右就可以食到超飽，真係好抵！