九丁目燒肉料理

Open Now

Now Closed

同食肉獸朋友仔食飯，要滿足佢，梗係多肉少菜啦，諗左一輪，走左去食燒肉，諗起都流口水。搵左呢間九丁目，舖面闊落，好似坐得幾舒服喎！好，坐低睇下有咩好食先。太多款式，選擇困難，揀二人餐唔係煩。牛油果紫菜沙律，開胃前盤，牛油果香軟。主角黎啦，啲和牛望落去都好平均，全部都係嫩嫩粉紅色，唔同部位，呈不同雪花。十勝和牛肉眼，肉質鬆軟，油花分佈均勻，入口柔軟嫩滑。鹿兒島A5和牛西冷，牛腰後端，因為運動唔到，油脂豐富，熱溶岀黎油脂鮮甜。蕯摩雞腿肉，本身唔係好雞肉既我，都要讚呢舊雞肉，雞有雞味之餘，肉質充滿彈性。食到咁上下，店員貼心問使唔使上個飯，梗係好啦！溫泉玉子紫菜飯，食住燒肉，有暖笠笠既飯，肚仔好舒服。珍寶元貝，超級厚肉，店員幫我地剪開連殼慢慢燒，元貝新鮮爽甜。龍蝦尾，一條龍蝦尾，我地一人一半都好有肉，燒到紅卜卜，用筷子一挑，整舊肉岀左黎，濃郁海鮮果，結實嘅肉質，正！最後仲有雪糕做甜品。