鍾菜 (Closed)

赤柱多外國人又多遊客，高檔食肆不少，連領匯商場都來個大翻“新“，變哂中高檔次舖頭，對象肯定唔係鄰近馬坑邨居民。呢度唯一酒樓係鍾菜，細細間但週末午飯時間都唔滿座，或者遊客唔食中菜附近居民又嫌貴？點心質素其實不俗。鍋貼香口不過下面塊網只係整色整水。叉燒包奶黄包皮薄餡多，鳕魚餃出奇地有魚味而唔腥。千層蛋糕忌廉份量適中。最得意係啲彩色膠蒸籠，唔知同蒸點心效果同竹籠有乜分別，又唔知點解有啲用膠籠有啲用竹籠呢...價錢稍貴但竟然免茶免加一，計落條數差唔多。去到赤柱唔想食西餐可以考慮呢度。