星海薈﹒譽宴

Open Now

Now Closed

平時去譽宴係食晚飯多，朋友話想去食下點心，於是中午嚟食。去得飲茶必叫蝦餃同腸粉🤤 蝦餃有4隻，每隻都脹卜卜而且晶瑩通透，食落係啖啖爽口彈牙既蝦肉，忍唔住食咗2隻🙈腸粉既叉燒唔會好肥，腸粉皮比較薄身，唔錯。小籠包都有水準，一咬落去肉汁滿瀉，好有喺上海食既感覺！鳳爪頗入味，但又唔會太鹹，食完唔需要一直飲水。鮮蝦腐皮卷係最意想唔到既，一嚟賣相靚靚，二嚟初時以為係蒸，冇諗過會食到脆卜卜口感似豬肉片既腐皮，而且蝦膠都做得出色~菜苗係一向食得健康既朋友點，一嚟到見佢顏色咁豐富，令人食慾增加。菜苗都幾爽甜，最後我地食哂成碟。