食嘢 (Closed)

話說大埔有「食嘢」同「飲嘢」兩間食店，屬同一個老細，一間主打食嘢，一間主打飲嘢。今日同朋友去試下「食嘢」，因為店內冇位，店員就安排咗我哋去「飲嘢」嗰邊坐。睇睇個menu，中式(咕嚕肉)，日式(海膽炒飯)，印度(咖喱) 都有，但佢嘅主打應該係咖喱，所以我哋點咗個咖喱雞同印度薄餅，仲有沙律菜。飲品就叫咗奶緹玫瑰烏龍同符碌茶。另外再喺「飲野」到點咗個深海拼盤。麻醬沙律，冇乜特別，就係生菜加麻醬。情願佢用普通碟裝，佢用呢個樽裝，好難撈醬。咖喱雞，因為朋友唔食得辣，所以揀咗微辣。另外可以揀原味/芝士/蕃茄/蒜蓉咖喱，我哋揀咗蕃茄咖喱。因為係微辣，所以唔會好辣，但又唔會話冇辣味蕃茄味就唔係好食到。至於雞就有d"鞋"同硬。印度薄餅，口感幾好，唔會太油，個咖喱汁都唔錯。深海拼盤，就係平時超市買到嘅炸魚條，炸蟹拑同埋花枝丸，麻麻地啦。尤其係個炸蟹拑，比平時食到嘅淋身。奶緹玫瑰烏龍，呢到話飲奶緹係有特定嘅方法，我就跟住佢咁飲。奶係厚厚嘅一層，帶點咸味嘅，加埋d茶就唔會溜，幾好飲。