大一海鮮火鍋料理 (Closed)

入秋開始有啲涼意，最啱去打邊爐，最近都比較鍾意去樓上、環境闊落嘅火鍋店，今次呢間大一都幾合我心意。古越龍山醉雞鍋 (半) $199 一上枱就聞到好香嘅酒味，藥材味相對淡少少，雞嘅份量都唔少，揀呢個鍋可以叫少啲肉🤪。黑豬腩片 (半) $138、羊肉片 (半) $108 超超超薄切，雖然我都幾享受淥一淥就熟，但今次啲肉係薄到一淥就會散開，厚返啲會比較好。但撇除厚薄度嚟講，肉味、肉質都係中上，抵食。鵝肝墨魚丸 (半) $78 墨魚還好，但咬到中間就散發勁香濃嘅鵝肝味，爆哂啲油香出嚟，好驚喜。黑松露帶子餃 (半) $68 黑松露唔會一pat過，而係好均勻咁散佈喺成份餡料中，食落成舊都勁香，中間帶子亦夠哂鮮甜。山葵芥末蝦餃王 (半) $58 蝦夠大隻彈牙，加上微微刺激味蕾嘅芥末，提鮮之餘，食得好過癮。珊瑚蚌 (半) $78 抵叫，不過略嫌調味過鹹，但價錢嚟講真係幾抵。蝦滑 $38 蝦味都幾出，應該幾足料，食起上嚟夠哂Q彈。響鈴 (半) $38 即炸，脆口唔油膩。稻庭烏冬 (半) $28 好鍾意食稻庭烏冬，不過呢個烏冬仲係冰嘅，如果有已解凍嘅會更好。香菇貢丸 (半) $38 香口彈牙，豬肉肉味出。