M3 Italian (Closed)

去大圍，唔知食咩好，既然幫襯過呢間又覺得好味，於是唔使唸，再嚟多次。半年後，仍然保持水準。餐廳裝修係Bar and restaurant，樓底高，感覺輕鬆舒適，一啲都唔局束。成班朋友聚會或知己漫談都好啱。單點主菜再加錢就可以有套餐，餐湯、餐茶或甜品，三揀二。🥣鮮帶子龍蝦湯 / 黑松露野菌忌廉湯餐湯一啲都唔hea，見個名都好吸引！鮮帶子龍蝦湯：有粒大帶子，龍蝦味啱啱好，唔會太淡或者好濃稠似用粉開咁。黑松露野菌忌廉湯： 一放上枱已經好香。同樣忌廉味唔太濃，配野菌好香。🍝香辣蒜片大蝦意大利粉份量足，加咗蒜片，有啲微辣。大蝦味道冇雪味而且爽口。🍕意大利辣肉腸薄餅佢係薄批，芝士多但唔膩。同樣份量嘆，每件都有兩三塊辣肉腸㗎。☕️甜品選擇多，有雪糕、窩夫、焦糖燉蛋、芝士餅等。但由於太飽，所以最後揀咗餐茶。