有錢佬靚粥 (Closed)

呢種嚴寒天氣之下，唔食番啲熱辣辣，出晒煙嘅嘢，點頂得住？尤其係我依啲戶外工作人仕， 10幾個鐘坐喺條街度，又要sell客又要成，閒時真係要補身養生，食返啖熱野暖下胃。嚟呢度食粥都唔係第一次，皆因佢開正喺筲箕灣著名食街東大街，夠晒就腳。之前嗰兩次感覺一流，真材實料得來又夠平，質素可以媲美出名嘅粥舖。今次嚟到竟然出咗新野，三款鹹粥， （蔥爆牛肉、蟲草花醉雞、濟州蠔肉碎）同一款甜粥（蘋果肉桂）。天寒地凍有啲酒氣好似會暖啲，所以揀咗食蟲草花醉雞。一打開煲蓋就聞到好香嘅花雕酒味，足底夠杰身，唔會水汪汪。雞件十分鮮嫩，而且份量足，冇欺場，讚！仲有啲蟲草花，又爽又甜，正呀！加埋啲杞子，感覺上好滋補咁，啱晒我！如果店家可以定期推出多啲新款嘅粥就好喇！