阿芳上海餛飩 (Closed)

午膳時間，想搵間未食過既，見到呢間阿芳上海餛飩好似幾好，而且環境OK (之前響同一條街食過另一間雲吞，食完成身油煙味，直到放工都唔散，唔想重蹈覆轍)，一於黎試下。午餐時間黎到，已經滿座，好彩有枱學生妹走人，即刻有位坐。打開餐牌，都幾特別，除左一般既白菜餃、韭菜餃，仲有出面無既「玉豆豬肉餛飩」同「洋蔥豬肉餃子」，可以雙併唔另收錢。既然係咁，我就要一碗水餃雙併，加豆漿，套餐盛惠$40，抵！餃子上枱，面頭係好香既麻油。餃子size適中，女仔淨食十隻一定飽 (驚唔夠飽既可以跟年糕或上海麵，但餃子就只得六隻)。洋蔥豬肉餃子，好香，洋蔥夠爽甜，豬肉無肥肉，好正，好啱我口味。玉豆豬肉餛飩，我先頭幻想D豆係好似青豆咁，粉粉地，但黎到又唔係喎，D豆係爽既，睇真D，呢D應該係長長既白豆，所以質感爽脆，豆既分量頗多，感覺好健康。不過相比起洋蔥，呢個比較淡口，我下次黎到會食十隻洋蔥。偷左同事一隻白菜餃，味道好普通，而且清淡，唔係我杯茶，但的確好多菜，夠健康。食完出番餐廳，完全無油煙味，而且食物又平又好味，我一定會再黎幫襯！