神木日本料理 (Closed)

今日收工之後，約咗細佬喺觀塘食飯，揀咗呢間日本餐廳，喺正APM出口對面，行過去好方便。叫咗一啲串燒試吓，估唔到水準好高，又唔貴！ 觀塘比較少日本餐廳，呢間係其中一間我覺得值得推介～ 塩燒牛舌芯 $58 旁邊有一個自家製嘅Wasabi醬，呢個係精粹，一食就上癮，一定要點黎食，出邊都冇試過食過呢個味道～ 牛舌芯口感食落軟綿綿而且爽口，一啖咬落去入邊啲肉汁泌哂出黎，成個口腔都係香濃嘅香濃嘅牛味！推介🥰🥰 秘製原條燒茄子 $38 本身睇落好乾，以為冇咩味燒得麻麻，但點知一撈就知道入邊好多汁，外層微微煎香，完全冇燒燶，而且好容易起晒成條出嚟，入邊好多汁，非常鮮甜清新，而且唔會話放咗太多調味蓋過茄子本身嘅鮮味。 一口牛柳粒$58 一啖牛柳粒，之後係一粒蕃茄，食完牛柳粒嘅濃味，食返一粒蕃茄，可以中和返油膩感，每一粒牛柳粒都好柔軟，大口大口食到香濃嘅肉汁。另外叫咗一個套餐，呢個套餐好抵食，木壽司定食配手卷同埋烏冬$168！ 成個套餐其實一個人食好飽，有六舊壽司，一個手卷，一碗烏冬，一個茶壺蒸同埋麵豉湯，仲有一啲酸蘿蔔。估唔到壽司性價比咁高，有新鮮嘅吞拿魚壽司、燒左口魚、赤蝦、赤貝、白身魚、日本鮮魚！