蠔站 (荃新天地)

Open Now

Now Closed

不嬲去過呢間蠔站好多次，不過多數都係去大角咀或者尖沙咀，啱啱先發現原來荃灣都有一間，仲要咁方便，咁今個星期五放工就去試吓啦。蠔站最出名嘅就梗係佢哋嘅$10蠔啦，第一次食之前其實覺得有啲驚，咁平會唔會好細隻或者好難食，不過試過嘅都知，雖然平但係佢嘅質素係非常好，所以次次我都起碼一人食一打先走㗎。今次仲叫咗三文魚刺身，估唔到佢除咗生蠔出色之外，啲刺身都好出色，佢同平時啲平價三文魚唔同，感覺比較厚身同埋肥美啲。朋友揀咗呢個炸啤酒薯條，佢話佢唔係太鍾意食生冷野，咁就叫一個小食啦。呢個薯條雖然食到冇乜啤酒味，但係唔知點解比其他薯條特別脆，會唔會係因為浸完啤酒之後炸嘅效果呢。呢個冬陰功意粉真係十分驚喜，估唔到呢度嘅ming course都做得咁好。佢食落真係好有冬陰功味，兩樣加埋竟然好夾，而且個意粉仲有好多海鮮，一啲都唔孤寒啊。呢間蠔站又平又抵食，而且仲周圍都有分店添，希望佢開多幾間啦。