六両三

Open Now

Now Closed

突然間想食滷肉飯，於是乎Openrice見到哩間台灣嘢，即刻殺去食。由於個招牌塊布都未揭，見唔到個招牌名，搞到搵鋪都搵咗陣時間。入到去唔使等位，揀咗吧台位，貪佢可以見住個廚煮嘢。裝修有啲似拉麵舖咁，店員都比較nice。正想話order滷肉飯，但店員告知賣曬。好嬲！好唔開心！- 川味紅燒牛肉麵 （$68）湯頭果然好古早味，濃得嚟又有陣蘿蔔嘅清甜味。麵嘅口感就麻麻啦，但係牛肉一啲都唔敷衍，有成四大塊，肉質睇落乾爭爭，但食落又唔會太嚡。雖然話係川味，但係一啲都唔辣㗎。- 三寶牛肉麵（$76）勁推介哩碗三寶牛肉麵，可以encore。個湯好似更加濃，每啖湯充滿牛肉味。麵嘅口感都係麻麻，但係牛肉就攞滿分。話明三寶牛肉麵，有牛腱、牛筋同牛肋條，每樣師傅都煮到好淋，好易入口，咬落嫩口仲好入味，話咁快就清碗。