興隆車仔麵 (Closed)

上深圳睇戰狼2，諗住去置富都會飲餐茶，點知彩福皇宴執咗，搞到煌府同景逸軒爆哂人龍...結果去Food court食興隆車仔麵。間檔口人氣唔錯，傳統車仔麵流水作業，一個淥麵一個加餸一個加汁同收錢，而且位位企檔阿姐都幾好口，38蚊6餸麵送菜連汽水，而且可以揀牛肚、雞中翼、沙爹牛肉等上價食材，仲有煎蛋豬腸豬紅蘿蔔麵筋等傳統嘢揀，都算相當抵食。今餐叫咗無糖可樂同幼麵加底，配魚蛋豬皮牛肚餐肉腸仔鹵水蛋。魚蛋雖無魚味但算彈牙，豬皮牛肚都腍，雖然每樣兩三件，但出面好多車仔麵，兩三件餸都夠膽收五蚊，而呢間加底只需加三蚊，相比之下，就抵食好多。順帶一提，個辣椒油仲非常惹味，的確係一個趕時間的唔錯選擇。