花丸 (Closed)

如果要揀一個又有得玩又有得食嘅地方呢，我覺得呢到真係當之無愧，係晚飯嘅時間入到黎呢度，場地差唔多係爆滿，好彩仲有兩個位啱啱好。我記得嗰晚個人特別肚餓，但係呢一度每一樣嘢食都差唔多要自己親力親為先至可以食。即刻覺得有啲驚，但係好彩仲會有幾個款式嘅食品係可以即叫即食嘅，例如呢一個壽喜燒鍋。呢個鍋用上嘅牛肉嘅質素都唔錯，好明顯唔係啲普通嘅肥牛，係用咗比較厚身嘅牛肋肉，味道濃厚。食咗有少少飽之後就可以開始玩呀，燒章魚燒我都試過好多次，但係每一次唔知點解就係冇日本嗰啲人燒得咁靚，咁大粒。但係味道來講，我覺得自己都整得唔錯啦。我特別就想講一講呢個大阪燒，係我第一次整。所有嘅材料佢會預先放入一個碗，整之前就將所有材料撈勻，放落去煎就係咁簡單。我揀咗個海鮮大阪燒，入面嘅海鮮會有蝦，會有魷魚，另外仲會有唔同嘅配菜。椰菜，蔥花，雞蛋等等，唔知佢個份量點樣溝，所有嘢只需要輕輕放落去煎10分鐘左右，再加d中意嘅醬料已經可以食，仲好好味，又有得玩，又有得食。佢呢個爐真係唔錯，一個爐可以有唔同款式嘅板可以換到，包括章魚燒，大阪燒甚至燒肉都可以一個爐搞掂晒，真係好方便。