華香園

Open Now

Now Closed

咁啱要去尖沙咀快買啲嘢，就順便去海防道呢個熟食市場快食。我同我女朋友叫咗豬扒出前一丁加煎蛋，凍咖啡少甜。豬扒出前一丁加煎蛋：簡直唔知佢點樣整出嚟，豬扒好柴，好乾。出前一丁我係叫爽面嘅，首先個面好明顯係焗出嚟嘅（即係好似你整杯麵咁樣整，好嚡）最攞命係出前一丁個湯淡而無味（我特登加$5換個出前一丁就係驚你用普通公仔麵個湯淡，你同我整到咁樣？）。個煎蛋煎到過熟（都係要加$5）。凍咖啡少甜：我只能夠講係冇咖啡味，好明顯係好多冰溝到好淡好淡好淡（唔係一般你叫少甜嗰啲淡，係好似杯凍飲擺咗喺度好耐啲冰溶晒晒咁淡）。兩個人盛惠$156 總結：我真心唔明一啲咁簡單嘅嘢點解可以整到咁樣，簡直就好似一個唔識煮嘢食嘅中學生喺屋企煮公仔麵俾自己食一樣，分分鐘都煮得好食過你。其實如果你唔想做可以執咗佢，擺喺度又冇生意又冇味道我都唔知你想點。