叉燒大王

Open Now

Now Closed

今日同屋企人又嚟叉燒大王食最出名嘅叉燒。其實喺呢度食過幾次啦，每次佢哋嘅叉燒水準都保持得好好。除左堂食，叉燒大王門口有外賣窗口，每日都有唔同嘅特價燒味，叉燒係禮拜二，半價有突啊！！～蜜汁燒排骨係禮拜一，都係半價！今日點左三個餸，有招牌叉燒、胡椒浸釀豆卜同埋豉油王大蝦。招牌叉燒叉燒同樣保持水準，肥瘦均勻，成碟叉燒大概一半便肥啲一半偏瘦啲，鍾意食肥或者唔鍾意食肥嘅人都滿足到。偏肥嘅叉燒油脂非常充足，肥瘦相隔，口感好柔軟好香，偏瘦嘅叉燒肉質比較結實彈牙唔會柴，叉燒汁甜甜地好好味，撈飯一流。客家胡椒浸釀豆卜入面有釀豆卜，粉絲以及其他配菜。胡椒湯味道濃郁，辛香暖胃，粉絲滑溜溜增加口感，豆卜煎過再煮所以保持到比較有口感硬身，可以吸收到湯汁同時唔會軟軟爛爛。湯底太好味，忍唔住叫碗瀨粉浸落胡椒湯食。最驚喜係豉油王大蝦大蝦有四隻，仲要隻隻都非常大隻，足足有成個掌心咁大，而且蝦殼煮得好脆，好入味，調味適中，豉油味香濃過癮！重點係蝦肉結實彈牙，非常新鮮！叉燒大王平日生意都咁好，想必係因為佢地堅持認真做好中菜，次次都保持水準先會keep到咁多街坊客同回頭客，希望可以一直堅持落去！