林昌記 (Closed)

相信無一個香港人對魚蛋呢種咁有代表性嘅街頭小食會覺得陌生，由小販年代到今時今日，魚蛋串串都可謂陪住我哋成長。成行成市，就會帶來良莠不齊，街邊賣嘅魚蛋，有別於傳統潮式魚蛋，絶大部分賣嘅都係黃色，表面炸過嗰款，用咖喱汁或味精湯淖熟，［魚蛋亦都冇魚味，但係你為左掩飾，專登加D咖喱汁將佢做成咖哩魚蛋，但係咁做太天真，因為你煮o既時間唔夠，咖喱味根本只係o係表面，而冇入到裡面］「食神」嘅批評真係一針見血(笑)。原味魚蛋$10/7粒今次食嘅魚蛋，全粒白雪雪，不經油炸，魚味濃鹹味輕，咬落好彈牙。店方提供自家制辣椒油，夠辣而不嗆喉。AFTER TASTE強勁，唔怪得舖頭有得一樽樽咁賣。咖哩魚蛋$10/7粒魚蛋喺咖哩汁煮熟，夠晒時間比咖哩汁滲入核心嘅外圍同內圍，汁雖然夠辣但唔夠香，亦無層次，好大機會只係用咖哩粉開，但配合咁爽口彈牙嘅魚蛋，都算係水準以上。其實大家都識分，點先算係靚魚蛋，但好少有整得咁彈牙同有真•魚味，無怪乎之前喺年宵市場賣出10萬粒嘅驚人成績！希望老闆可以保持水準，令千千萬萬個食神刮目相看。