皇室盛宴 (Closed)

同事們食晏經常去一式一樣既快餐店，雖然價錢經濟又快，但工作咁辛苦都係為左食者。有見及此，今日出糧我地幾位同事決定要搵間特別既野食下當慰勞下自己，上網見呢間既野食都幾特別，就打電話訂左6位12:30。 我地一行6人12:30準時到達，我地係今日既第一檯，可以暢所欲言咁傾下公司野。坐左約5分鐘就送上餐湯，女侍應介紹係新創麥精湯，其實一開始我地仲以為係餐飲，好有趣既味道，既有麥精既甜味，也有一點點咸味，有層次之分。主菜就分別揀左海虎蝦，帶子茶漬飯同意粉。海虎蝦最好味，煎得好香，海虎蝦size一向有番咁上下，肉質彈牙有口感，濃味既虎蝦汁撈意大利飯食好好食，超讚！意粉同帶子茶漬飯都okay，意粉味道剛剛好，好香，菇同煙三文魚落足料，而茶漬飯係用意大利飯，一道西日fusion菜式，飯有濃烈既伯爵味，加上醬油味道都okay，而帶子係刺身食，北海道直送，抵食！整體感覺都還好，唯獨是等既時間比較耐，等左接近約廿分鐘先送上主菜，眼見一碟碟咁送出，應該都係即落order即準備，建議上菜時間可以改進。