手作功夫茶 (盈暉薈)

Open Now

Now Closed

依間「手作功夫茶」開咗一段日子，較早前幫襯過一次，不過，嗰次就無寫食評。今次兩公婆行完短山上馬騮山，落返嚟美孚，就齊齊買杯台式茶飲解解渴。如果以賣茶飲店嚟講，佢個鋪位都算大，裡面仲有少少企位，雖然窄窄哋，但可以企入去涼吓冷氣等。有啲咩選擇，一圖睇晒，不過，最有趣喺晌每一組大類別都加咗啲「功夫」術語，如爆拳、輕功、內功……等等。亦如大多數茶飲店，可以額外加配料，而甜度、冰度又有得揀。伯爵珍珠奶茶 $26、鮮芋頭Q奶綠 $29由於用咗紙杯做包裝，亦封埋口，所以，就睇唔到裡面個樣喺點，當然，打卡度就低咗，但就比起用膠杯就環保啲。珍珠奶茶飲得話多唔多，話少亦唔少，以伯爵茶做茶底，效果唔錯喎，幾有茶香，而且，珍珠亦具咬口；老婆嘅奶綠喺以綠茶做茶底，算別有一番風味，飲落茶嘅香味帶微甘，底下有嘅芋頭粒，好粉、好甜。綜合而言，兩杯凍飲都唔錯，定價亦算相宜，夠真材實料，而且，次次經過呢間店都唔多人，所以，唔使點排隊，唔需要等好耐。