軟橋米苔目餐廳 (Moved) New Location

唔知大家有冇睇過一個連登post話，瀨粉一定係最古惑既食物，因為夾到埋口都會溜走。(痴女小編：其實感情咪一樣，以為會開花結果咩，最後又為何結果不是我想像的，嗚嗚嗚)講番正題，原來米苔目都係古惑仔既一份子，比佢既兄弟銀針款淋啲軟啲，都係滑嘟嘟夾唔到，只可用匙羹。當日小編同友人各自叫左碗米苔目，一個乜Q軟豆腐，一個拍青瓜。米苔目可以配兩個餸，我地分別揀左鴨肉，豬潤同豬脾肉，而湯底default係豬骨，不過我地加三蚊轉方魚湯。食得出食材都新鮮，湯底都冇乜味精，但就不算好特出，係清淡、飽肚之選。另外Q彈軟豆腐係我鐘意既口感，好彈牙，似食緊魚片，但調味只有五味粉，有點兒單調。最後就係拍青瓜，呢個可以唔叫，因為冇乜蒜味，唔夠香。平日夜晚六點九左右到店，食左一個鐘，發覺店內都冇乜食客，希望老闆可以改良下煮法調味，例如提供辣菜脯，然後有更多人會幫襯。總括嚟講，感覺上呢間小店都係真材實料，值得支持的。