上海包餃店 (Closed)

擔擔麵個湯底一般濁不見底，呢度用清湯就份外特別。賣相好靚，睇到大嬸廚師用心去放花生碎同肉碎等食材，創造出一個碎料山丘。山丘睇嚟普通，食落先知暗藏少辣，仲集齊軟、硬、爽脆三種由唔哃食材帶嚟的口感。略嫌麵條煮得較林身，見唔少長者街坊嚟食麵，煮林啲又確係無可厚非。下次嚟會試吓要求食硬身麵，睇吓廚師批唔批。食晒碗麵已飽八成，貪心啲叫埋窩貼同牛肉餅。兩款食物都唔係煎到脆底嗰隻，色水欠奉，而且唔夠熱，不過勝在有內涵。窩貼皮薄饀多；牛肉餅有舊式上海店的手作風味，包包軟熟冇苦味。要二揀一，首選窩貼。小店只設幾個堂食坐位，對住經典綠色紙皮石食飯，感覺好似去咗七、八十年代的公屋。呢種古早風味，同呢個社區真係好夾。