麥金.麥金馬來西亞特式茶啡室 (Closed)

裝修有馬拉嘅味道，餐廳亦都好整潔，好似去咗馬來西亞旅行去佢一啲民間小店。咖央多士，咖央醬非常香濃，配埋煉奶，簡直係一個甜品。老鼠粉有驚喜，原來係銀針粉撈肉碎再配埋半肥瘦腩肉，勁易入口，層次分明，秘製嘅肉碎加埋香蔥同乾蔥，勁易入口。海鮮喇沙參參，喇沙湯底非常香濃，十分夠料，海鮮有蝦，有魚片，蜆肉，加埋豆卜，豆卜係吸晒湯底嘅精華。泰式生蝦，每一隻蝦都係啖啖肉，仲要非常新鮮，原來拼埋青瓜同泰式酸辣汁會份外清新。芒果香蕉奶，香蕉同芒果嘅比例啱啱好，大家唔會搶晒大家嘅味道。