好運強記食堂 (Closed)

對於好運強記的招牌菜(脆皮糯米雞)仰慕已久,今次約齊一眾為食腳前來品嚐,預早訂定幾款特色菜,冰醉瀨尿蝦有成支筷子咁長,香甜的花雕酒味,冷盤之首...正!!冰鎮拼盤有豬耳仔..脆口,豬腳..幾爽,鵝翼..數量少了些,鵝腎...又爽又脆,是四款之中最正的一款!!黃金蝦真係巧巧味,我地極速食晒啲蝦,仲想叫白粥食埋啲蛋黃碎,可惜沒有白粥胡椒蟹味道就一般,登!1登!!登!!櫈!!!脆皮糯米雞終於出場,用臘腸和少少雞肉及糯米飯釀回雞皮內,再用油紅燒,超好味!!臨場再柯打幾款特色菜,糖醋排骨個汁非常杰身,味道一點不搶喉,不似一般上海食店的做法,老闆邱先生更大方為我們介紹,他是用麥芽糖來煮所以濃度適合.松茸蒸日本雞蛋勁好味,鮮甜幼滑,有益養顏,不消數分鐘,已經美人照鏡!!南乳骨前所未有的甘香脆口,絕不油膩,是送酒之選...正!!啫啫芥蘭煲蝦醬好咸!!邱老闆送贈只此一家的(皂角仁)糖水,一小包可煲十人份量,每碗得數粒配洋意米煮腐竹,煙煙奀奀幾得意熱情的邱老闆推薦嚐試吓他們的(八寶鴨),仲話蓮香遇到對手了,咁犀利下次就要試試