喜尚嘉喜宴會廳

Open Now

Now Closed

好耐無黎過喜尚嘉喜飲茶，今日阿爸阿媽約黎呢間，佢地話呢間濶落啲方便擺bb車喎。一點幾黎到已經勁多人等位，等左廿分鐘倒開始問撘唔撘枱，話左撘，但上到去張大枱又比左人，我地幾個撘枱嘅企哂係度無人理，真係火火地，好彩之後安排返枱比我地，唔使再排過咋。坐低叫野食，好多特價點心好平呀，假日都係七個八，平到咁真係有啲驚。唔理咁多，咩都叫哂先。香煎鯪魚餅擺到明係炸唔係煎，但魚肉都幾彈牙，係油左啲。香煎馬蹄糕煙煙韌韌馬蹄又幾爽口，甜甜地好味。皮蛋瘦肉粥好足料，食完無口渴，唔錯。韮菜滑豬紅得啲薑味，麻麻。炸芋絲春卷真係有一絲絲芋絲，少少豬肉，撈左五香粉，又炸得幾香脆喎。鹹花生豬骨粥唔掂，碗粥酸嘅，怪怪味。味菜蒸大腸入味又多淋，但出左勁多油。涼瓜乳豬炒河唔係好大碟，但三十蚊有碟炒河，真係外賣都唔止呢個價。乳豬涼瓜都有幾多件，個汁調味亦唔錯，一個字，抵！三個人埋單都係百二蚊，平到笑，夏天黎涼下冷氣都抵哂啦。