東海酒家 (Closed)

屋企人想食乳鴿，搵勻曬四周圍嘅外賣，咁啱見到東海晚市做緊優惠，仲有紅燒乳鴿食，於是就買外賣黎試下啦。以下係折前價錢。例牌金沙海生蝦（$128）金沙蝦有10隻左右，份量適中，而且師傅有剪走啲腳同蝦頭嘅刺，幾好。可惜炸得唔夠脆，啲蝦殼好硬，都係無辦法成隻食，鹹蛋都唔係好夠味，有啲普通。細粉豉油皇銀芽鵝腸（$48）鵝腸細細份唔會太多，做小食啱啱好。食落都幾香幾爽口，唔會太韌。例牌醒胃黑醋骨（$108）排骨食落有啲黑醋味，酸酸甜甜，都幾香幾開胃。不過以普通嘅黑醋排骨黎講，佢個價錢都偏貴。百花炸釀蟹箝（$55@1隻）本來覺得$55一隻都幾貴，但一開就見到佢好大隻！蟹鉗炸到好脆好香口，食落都爽口好食。不過食到真蟹肉嘅時候就有啲霉味，感覺唔係好新鮮。紅燒乳鴿（$78）乳鴿燒得幾香，而且份量啱啱好唔會太細隻，食落啖啖肉。餐廳仲附送埋豉油同椒鹽，不過就咁食已經有味，所以今次就無點到啦。福如東海炒飯（$118）炒飯配料有菜、雞肉同蝦，都算幾足料，不過紅蘿蔔食落有啲硬，麻麻地，成個炒飯都係不過不失。去到見到佢每日都有做唔同優惠，今次外賣自取就有68折，折完係$475左右。