forte (Closed)

完咗大Project, 老細話請大家食餐好, 喺Openrice見forte嘅半自助午餐正評幾多, 又有優惠, 就一於試下!自助餐區嘅沙律選擇多, 亦有數款芝士同cold cut選擇。當日西湯椰菜花忌廉湯好濃郁, 配上餐包食一流。相比之下, 中湯人蔘雞湯就有點遜色。主菜方面有8款選擇, 今次就揀咗星洲海南雞飯。擺盤幾靚, 並附上雞湯和三款醬料。雞肉已去骨, 皮薄肉嫩唔肥。油飯粒粒分明, 而黑豉油則稠身香醇。同事嘅肉眼和羊架質素都幾高。甜品方面選擇只有6款, 而且質素一般, 有點失望。總括嚟講, 前菜主菜好食, 但折扣後連加一都$250以上, 性價比唔算高, 但可以一試。