臻味冰室豬扒酸辣米線

Open Now

Now Closed

星期六做到三點幾先有時間食 lunch，諗住下午茶有優惠，有so。點知入咗一間無下午茶，都算啦！以前食過臻味，覺得唔錯，無下午茶都照食啦！估唔到餐牌換咗，連味道都轉埋。無咗我最愛嘅濃湯食雜，咁我叫其他啦！我唔食辣，叫咗雞絲腎片米線+凍檸茶。飲品全部正價，盛惠$70，貴就貴啦。香港好味嘅餐廳真係越來越少，當做支持下。點知碗米線嚟到，賣相已大失所望，而且份量真係寥寥可數。可能我叫嘅係雞絲腎片，賣相無咁大堆頭，但我“了”咗兩下，確實雞絲唔多，腎片數量就可以接受，不過真係誤以為係下午茶餐咁。份量都算啦，當我大食啦！最估唔到係佢個清湯，真係好清，只係得塩+水，真係未食過咁差嘅清湯。而杯檸茶，佢都的而且確俾咗4片檸檬，不過係超薄，篤到爛都無乜檸檬味。收得$18一杯，咁高利潤係咪至少俾多少良心呢？哩餐係真正farewell，臻味不再，係時間說再見了。