Chatuchak (Closed)

food court食lunch就係貪快貪選擇多，平就唔平得去邊㗎喇，好彩味道都叫做可以接受，所以平日放lunch都會去下希慎food court。通常食嚟食去都係果幾間，今日認認真真兜個圈，發現上完電梯2:00方向嘅角落頭入邊有間泰國嘢，見到嘅收銀員同工作人員都係疑似來自泰國嘅姐姐，斷估煮出嚟嘅嘢都幾有泰國地道味道啩，所以前後點咗個「泰式肉碎煎蛋飯」同埋「泰式濕炒牛河」，再加個小食「芭堤雅燒雞扒」。個「泰式肉碎煎蛋飯」堅係唔就住香港人一般食辣嘅程度，🥵辣到我係咁飆汗，但又辣得好過癮，加上肉碎炒得好香口惹味，愈食愈想爬多兩啖飯。「泰式濕炒牛河」都試咗幾啖，唔係一般香港食開嘅河粉，呢隻厚身闊身啲，而且唔係一條條，而係一塊塊，每塊都被芡汁厚厚包裹住，味道自然唔使多講，相當香濃。至於個「燒雞扒」就無上面兩款咁驚喜咁好食，凍嘅，本身又無乜味道，要靠泰式酸辣醬提味。整體嚟講，佢啲粉麵飯味道質素，絕對食得過，係可以encore嘅水準💪🏼。