定食 Doraya (駱克道)

Open Now

Now Closed

我A姐諗大部分香港人同我一樣，日日食日本嘢都得！老實講，主打吞拿魚魚生飯嘅日本料理舖唔多！聽好友K先生推介，我哋就去試下位於銅鑼灣同灣仔交界嘅定食DORAYA！舖頭細細，大概得廿個位，所以經常要等位，我哋都等咗成個鐘。得咗咁耐，咩都唔好理，飲番啲野先。成日都覺得梅酒好甜，好似飲糖水咁。點知今次試綠茶梅酒又幾正喎，加咗綠茶，多咗啲茶澀味，中和番，即刻無咁甜！加埋冰啱晒夏天！等咁耐，就係為咗食呢到最出名嘅吞！拿！魚！我哋嗌咗香葱伴藍鰭吞拿魚腩蓉飯定食。唔食葱嘅朋友，可以好似我哋咁走咗啲葱佢。聽講呢到嘅魚腩蓉係用吞拿魚嘅中腩同背部混合而成，所以無淨係腩咁肥膩！魚蓉係師傅用人手剁成。魚生飯中嘅米飯絕對係另一重點，DORAYA用被譽為日本第一米嘅新潟越光米，係用高山上嘅雪水來種米，米香黏口。配埋特制刺身豉油,，吊出魚鮮味。非常滋味！除咗碗飯，跟餐嘅漬物同玉子都唔差，食完好滿足。今餐兩個定食加支梅酒大概HK$500，係支酒貴啲，不過啲吞拿魚真係好香好肥，可能係全香港最好食嘅吞拿魚魚生飯。