玄鮨 (Closed)

又到復活節嘅最後一日，成個假期都冇乜做過啲乜嘢，係最後一日梗係要食返一餐好嘅為呢個假期寫上完美嘅句號。於是乎我同女朋友就嚟咗呢間銅鑼灣米之蓮餐廳食午餐。一坐低就送上熱香麥茶，等我哋可以慢慢揀嘢食。前菜係芝麻牛膀，有淡淡醬油香味，爽甜開胃。我同女朋友都不約而同揀咗三色丼，即係有海膽、三文魚子、香葱吞拿魚蓉。呢個三色丼大大碗，三樣餸個份量一啲都唔小，完全鋪滿晒成個碗面。海膽帶有微微海水味，極度新鮮甜美，食起嚟一啲腥味都唔會有。三文魚子大大粒，咬破表皮之後，裏面嘅汗液非常鮮甜。香蔥配上吞拿魚蓉亦都係一個絕妙嘅配搭，香蔥充分突顯左吞拿魚嘅鮮味。而飯入邊亦都加咗少少醋，令人很醒胃。飯裹邊仲夾雜左少少甜腐皮，醃製過的菇片，成個飯絕對係百分百美味。燉蛋中有柚子皮，取其香味，仲有豬肉、蜆肉、冬菇等等，配合咁多種材料嘅鮮味，燉出嚟蛋滑美味。食完個大碗當飯之後，仲有一個冰凍soba。蕎麥麵夠冰凍，完全能夠refresh到味蕾。最後有自家製水信玄餅作甜品，水原餅裏邊有金箔，為呢個甜品添上幾分貴氣。呢一餐真係101分，好期待下次再嚟呢度食。