8鍋臭臭鍋 (金巴利道) (Closed)

同朋友去開尖沙咀行街，係尖沙咀食野不嬲都無乜心水，最多都係去食FOOD COURT，但朋友話附近有間台式臭臭鍋，之前成日去台灣都未真係食過，於是今次決定試下新野。朋友話呢間野好出名好多人排，但可能因為平日關係，我地去到等左無耐就有位啦。店舖唔算太大，但係坐落去感覺唔會太逼，環境都算舒服。朋友叫左個小辣既「台式麻辣鍋」，呢度既辣都唔好講笑，就算平時我都會食辣，但呢度既辣真係好夠辣，試左朋友個個兩三啖都唔係太食到落去，不過係真係好惹味。入面好足料，加埋個公仔麵，感覺有D似韓國部隊鍋。因為我自己對臭豆腐無太大興趣，「8鍋」雖然主打臭臭鍋，但係除左臭臭鍋之外，其實仲有好多其他選擇，最後自己揀左個「芝士牛奶鍋」黎試。呢個芝士牛奶鍋真係一試難忘，牛奶味好濃郁，加埋塊芝士溶落個湯度，真係不得了！食到最後，我差唔多成個湯都飲埋，湯底最讚！成個鍋都好足料，有娃娃菜、白豚肉、貢丸、麻蟹柳、金針菇、蛋餃……跟套餐又有鳥冬同白飯，食到好飽好滿足。雖然話係一人一鍋，但係呢間野一個套餐已經食到好夠飽，所以就無再叫到Ｄ咩小食。兩個人埋單平均每人都係100蚊鬆D，係尖沙咀食到呢個質素既餐廳，算係物超所值。