橘焱胡同燒肉夜食 (Closed)

終於約到台北過江龍—橘焱胡同燒肉，裝修上有濃郁中國色彩。鋪頭仲特別安排座位俾等候既食客，又有儲物櫃俾坐Bar台食客放袋，服務貼心，而且大部分員工係台灣人，好好態度。坐Bar台既好處係有專人服侍燒埋野食，我地可以安心吹水。食物係即場調味，台面有檸檬汁以及蔥花洋蔥碎用來拌肉食。係等食燒肉時，試左佢酸甜辣蘿蔔以及帶子裙邊，兩碟都好入味，有種欲罷不能既感覺。好感動，竟然係用備長炭即燒，甘樣燒出來既食物又香又原汁原味，我都係第一次係香港甘燒法。熱情既服務員先幫我地燒左霜降松阪豬，炭火逼晒啲油出來，點上檸檬汁，清新又爽口。之後係油脂分布均勻既和牛翼板肉，牛味重，嫩口，冇得頂。食左兩款肉，服務員好貼心幫我地燒左綜合野菜，消下油膩感。不得不讚下，火候掌握到位，野菜仲保持水份補足既狀態，好爽脆。然後係清酒帶子，大大粒帶子吸收左酒香，好爆汁，松葉蟹腳更係鮮甜到好似新鮮即劏一樣，極力推薦。最後係梅花豚肩排，有嚼頭，肉又實淨，送飯一流。食物固然好新鮮，服務態度更加冇得頂，每燒完一樣例必換網，務求唔痴肉又唔燶。等既過程中，服務員都會同我地傾下野食岩唔岩口味之類，感覺好受重視。