台灣郎 (Closed)

愈黎愈多台式復古風格裝修嘅餐廳，今次就同姊妹黎左呢間食，有上下兩層，入面仲播放媽媽年代台灣歌曲，懷舊風格更特出。高雄夜市蚵仔煎 $88 好大塊，望落好似好濕咁，仲諗緊會唔會好淋一劈野咁，但食落又唔係個會事，反而係可以一塊塊咁夾到，唔會好濕又唔會好乾爭爭。仲要好足料，好多蚵仔，啖啖都會食到，最正係點埋個醬酸酸甜甜，呢個真心推介。廟口肉燥飯 $35唔想食咁油膩就揀肉燥唔揀魯肉，呢個就比較一般，唔夠香，味道都較為啖口，下次試下魯肉先，可能會好味啲。台灣紅燒牛肉麵 + 薑母茶 $88呢碗分量唔少，四舊牛好淋身，仲有各兩大舊白/紅蘿蔔，都係好淋好入味，湯就好濃牛味，唔辣唔油，好好飲，而麵就係扁身，質地彈牙。套餐有以下呢幾款，其實係加多幾蚊有埋杯飲品。佢有得儲印仔，每$50就有一個印，一個月內儲8個就可換當$50用，岩哂住係附近嘅人。