沐白小農 (Closed)

農曆年假，雖然話有多人去咗外地旅遊，但係，其實周圍都係好多人，因為有好多內地同胞和外國人來了香港，感受香港過年的氣氛。今日下晝去咗荃灣路德圍嗰頭掃街，嗰頭出晒名多嘢食、多嘢飲，仲可以見識一下兩檔豆腐花如何賤賣吸引遊人排長龍添。我哋當然唔會同佢哋癲，浪費寶貴時間去排隊食豆腐花。梗係去隔籬檔台式飲品店飲好嘢啦。呢度有好多款台式飲品，凍熱都有，即叫即製。一次過買咗三杯，分別係少冰少甜的黑糖波霸鮮奶和大甲芋頭鮮奶，同埋熱的金桔檸檬。急不及待要飲。【大甲芋頭鮮奶】香芋味好特出，加埋香滑鮮奶，口感好滑，口腔充滿牛奶和芋頭味。【黑糖波霸鮮奶】呢杯係招牌貨，唔飲唔得。個顏色好靚，係時下好流行嗰種虎紋。雖然係少甜，但飲落都好黑糖味，甜度比一般的白砂糖更甜，但係多一重香甜味的。仲有，底下啲珠珠煙煙韌韌好正。【金桔檸檬】呢杯係專登外賣俾老豆飲的，因為佢呢輪有啲咳。飲呢杯金桔檸檬可以幫助佢清下喉嚨開下聲。佢飲咗之後，話金桔味超重。我解釋，梗係啦，我親眼見住個職員新鮮榨咗好多桔仔來沖呢杯嘢，絕對係真材實料，所以老豆把聲已刻開番。下次，我喉嚨唔舒服都要來呢度買番杯飲下，好過去買涼茶飲。