老鍋台式火鍋 (京都廣場) (Closed)

同舊同事聚會，大家都咁鐘意打邊爐，就試下呢間老鍋。一入到門口已經見到有一個放天燈既位，客人可以自己打祝福既字句，個天燈就會出現係個mon度，呢個做法幾新潮幾得意，又有台灣既感覺。我地叫咗個美人鍋湯底($228)，個湯好香好濃，好足料，我地每人都飲咗兩碗湯先再打邊爐。湯入面已經有原隻烏雞，店員幫我地拎上嚟再剪埋，雞幾多肉，唔錯。跟住就開始打邊爐啦，嚟咗個美國特級牛肋肉($218)先，牛味十足，唔洗點醬油都好夠味。一品花鵰醉雞件($88)，一嚟到已經好香酒味，肉都好滑好鮮甜。梅菜豬肉丸($48半份)同蝦丸($48半份)，兩隻丸都係手工做，所以感覺特別新鮮。餃類拼盤($98)，啲料好多，店員介紹都係自家做。台灣水蓮($68)，食咁多肉要叫返啲菜，水蓮唔係好多打邊爐既地方都有。鮮炸響鈴($68)，即炸所以嚟到係熱辣辣既，好好食。咸蛋黃炸魚皮($68)，自從有咸蛋黃既嘢食之後，如果有都會叫嚟食下，因為個味真係太香，呢度仲要係自己即炸，好好食！