Video
Read full review
2022-09-19
286 views
（2022年7月新開嗰陣去食）好耐無食台式火鍋，今次就嚟到旺角朗豪坊8樓，食仲試業緊嘅「好呷台灣火鍋」。本身諗住早啲食、早啲消化，預早一個鐘前拎定飛，點知喺假期加上三號風球下，大家都出晒街食飯😆晚市時間非常熱鬧，去到餐廳門口眼見全部都係人。-晚市可以食120分鐘，一批批人放入去，絕對要開住App睇叫籌。好呷🍲同樣係叙福樓集團旗下，大家可以喺App到拎定籌，再睇叫號。💡牛角金會員優先入場嘅待遇呢度都用得，輪候時間會比一般walk-in客快（要搵埋金會員一齊食）。我哋差唔多時間分別拎咗普通飛同金會員嘅籌，最後喺咁繁忙嘅日子，用金會員張籌，大概都等咗2個鐘先有枱入得，至於張普通籌都仲排緊……（所以真係好想、好想、好想食，請攜同金會員）— 正 題：食 咗 咩 ？—120分鐘晚市放題：·台南 $298/位 （假期+$10）·鴛鴦鍋（+$50）放題按鍋物款式多少，分成4個級別：台東、台中、台南、台北。「麻吉遊·吃台南」主要嘅鍋物就多咗麻辣嫩牛肉、牛小排、櫻花蝦墨魚滑、蝨目魚丸、花膠、馬蹄木耳貢丸同鯛魚片。除咗呢幾款，仲有得食蛋餃、三星蔥爆漿貢丸、麻辣芫荽雞滑同高麗菜水餃。*芫荽雞滑，麻麻辣辣，內有
好耐無食台式火鍋，今次就嚟到旺角朗豪坊8樓，食仲試業緊嘅「好呷台灣火鍋」。
本身諗住早啲食、早啲消化，預早一個鐘前拎定飛，點知喺假期加上三號風球下，大家都出晒街食飯😆晚市時間非常熱鬧，去到餐廳門口眼見全部都係人。
-
晚市可以食120分鐘，一批批人放入去，絕對要開住App睇叫籌。好呷🍲同樣係叙福樓集團旗下，大家可以喺App到拎定籌，再睇叫號。💡牛角金會員優先入場嘅待遇呢度都用得，輪候時間會比一般walk-in客快（要搵埋金會員一齊食）。
我哋差唔多時間分別拎咗普通飛同金會員嘅籌，最後喺咁繁忙嘅日子，用金會員張籌，大概都等咗2個鐘先有枱入得，至於張普通籌都仲排緊……
（所以真係好想、好想、好想食，請攜同金會員）
— 正 題：食 咗 咩 ？—
120分鐘晚市放題：
·台南 $298/位 （假期+$10）
·鴛鴦鍋（+$50）
放題按鍋物款式多少，分成4個級別：台東、台中、台南、台北。
「麻吉遊·吃台南」主要嘅鍋物就多咗麻辣嫩牛肉、牛小排、櫻花蝦墨魚滑、蝨目魚丸、花膠、馬蹄木耳貢丸同鯛魚片。除咗呢幾款，仲有得食蛋餃、三星蔥爆漿貢丸、麻辣芫荽雞滑同高麗菜水餃。
*芫荽雞滑，麻麻辣辣，內有少少軟骨，咬落咔咔聲。
湯底有9款可以揀，我哋就貪心啲試兩款，揀鴛鴦鍋：1號酸菜白肉鍋＋4號藥膳養生雞鍋。湯底一開始最濃味，食食吓加湯就只係加雞湯，感覺好似淡味咗。
自助區有別於牛角Buffet，熟食、飲品、配菜分別放喺唔同區域，或者係想大家行多幾步，消化消化吓。
飲品方面，如果你鍾意飲珍珠奶茶，你又可以珍奶飲到飽🧋🤣分別有黑糖珍珠奶茶同芋香珍珠奶茶。偏人工紫色嘅🍠芋香珍奶甜度滿分，味道就似雀巢芋頭雪條再加糖，甜得過癮。
唔想飲廢水，可以飲🍵冷泡茶：白桃烏龍茶、桂花烏龍、玄米茶、茉香綠茶。餐牌上面仲寫有愛玉冬瓜茶同桂花烏梅汁，不過今次喺雪櫃就見唔到有啦。
自助區有唔少台灣小食，我哋就大包圍，每款都試一件先～台灣腸、*手抓餅、甘梅地瓜薯條、鹽水雞、地瓜球、炸花枝丸、鹽酥雞、炸杏鮑菇、滷豬肚、滷牛肚、滷豆腐、肉燥飯等。
*食手抓餅嗰陣，反轉睇到個餅底燶咗喎……
去到尾聲仲要留位（胃）試甜品：好呷綜合紅豆湯。每人一碗仔，紅豆湯加仙草、芋泥同少許芋圓。仙草滑溜，紅豆湯有粒粒紅豆🫘不過芋圓就麻麻，無煙韌口感，似粉糰，驚喜在有綠色款。
以為已經食完？原來仲有Movenpick雪糕🍦可以揀朱古力/雲呢拿味。（好似係叫台南、台北餐先有，由職員派發）
兩個鐘食咁多嘢，胃，你仲頂得順、消化得切嗎？🥲
-
小事一則，淥肉嘅時候或者會發現有啲豬肉、牛肉煮咗好耐都仲係粉紅色，其實係正常嘅，煮到一定時間就食得，擔心嘅話可以問吓。
Post
