老媽拌麵 (北角匯二期)

Open Now

Now Closed

自從喺北角返工之後，北角匯附近食肆基本上都俾我試勻晒，老媽拌麵就係其中一間我會回頭嘅餐廳。今日有個舊同學過嚟搵我食飯，我哋叫咗兩個套餐，其實有麵有前菜又有飲品，都算幾豐富。前菜分別係麻醬秋葵同車厘茄，秋葵加咗麻醬之後容易入口得多，而車厘茄仲有淡淡的話梅味，令人非常開胃。溏心蛋肉燥飯充滿台式味道，揀咗秘製微辣，最啱我呢啲鍾意食辣又唔食得辣嘅人。麻辣老鍋湯麵辣度就相對較強，麻辣湯底非常出色，麵質又夠彈牙，基本上配簡單嘅配菜就已經夠晒好味。另外我仲加配咗小食，揀咗澎湖花枝丸，台式嘅花枝丸真係零舍彈牙好味，三粒嘅份量啱啱好。朋友就話想飲珍珠奶茶，呢度嘅老媽黑糖珍珠鮮奶茶都相當有水準，珍珠用黑糖煮過，既Q彈又入味。我就揀杯滋潤啲嘅金羅漢果海底椰熱飲，真係夠晒真材實料。