臺坊 (加拿分道) (Closed)

今日去咗尖沙咀行街，瞓到攰攰地喺附近搵啲嘢食下，即刻上OpenRice望吓附近有咩好介紹，見到厚福街有間台灣食店都幾吸引於是去試吓，臺坊台式料理。舖頭雖然唔大，但係望落去都幾整潔，最啱就係行完街攰攰地食少少野休息吓。望下個餐牌都有好多嘢食選擇，幾樣嘢都幾吸引，我自己最鍾意就係食啲台式小食，同埋台式飲品。鹽酥雞，鹽酥雞炸到金黃色而且好香，入口一啲都唔油膩，雞肉仲係好嫩滑，多汁。而且雞皮炸到好香脆，非常之惹味。紅燒牛肉麵，牛肉嘅份量都算多，而且牛肉好林，牛肉味又香又重，另外蘿蔔非常之入味，加埋牛肉麵個湯好鮮甜，一碗香濃嘅牛肉麵，連湯汁都飲晒。炸花枝丸，花枝丸都算大粒，加上即叫即炸上到枱熱辣辣，入口墨魚味好香，而且仲係爽口彈牙，加上有少少墨魚粒，令到口感非常之正。椒鹽豆腐炸到金黃色，都係一個好惹味嘅小食，豆腐外邊炸到香脆，而中間仲係好香滑。加上少少椒鹽調味，味道都幾好。下次經過尖沙咀一定會再嚟食，性價比高，味道又好。