黑丸嫩仙草 (Closed)

香港華洋雜處，各處鄉村各處例。對美食嘅追求無分國界，所以香港地充滿各式各樣有地道特式嘅食肆。呢間新開小店專門賣台式地道甜品，店小坐位更少，只有三個坐位同一張立食枱！！裝修簡單乾淨，類似香港八十年代嘅快餐店。聽住國語同閩南話歌曲嚟叫嘢食，真係好有台灣FEEL😁舖頭面臨大馬路，所以老細用膠做屏風，既阻風隔音，又可以望住街景食嘢。黑丸嫩仙草$30既然以此命名，梗係要試吓呢個招牌菜。呢個名對於香港人可能比較陌生，其實黑丸即係台式珍珠奶茶嘅珍珠，嫩仙草就係涼粉。同間舖嘅裝修一樣，呢個甜品以傳統做法，以牛奶綠頭仙草做底，之後加金瓜圓芋圓同黑丸。其實我最想試嘅係芋圓同金瓜圓，因為從來未試過喺香港食過有台灣味道嘅芋圓，一係太腍，一係太散。呢次食嘅芋圓、金瓜圓，四方圓角似枕頭，天然芋頭、蕃薯甜味加Q彈口感，越食越想食，而且唔會一咬就散，有少少似韓國年糕嘅口感。牛奶撈埋仙草同綠豆，食落充實飽肚，珍珠非常彈牙，比其他珍珠奶茶店提供嘅更出色。店雖簡陋但風味搭夠，老闆ONE MAN TEAM一腳踢，態度殷勤親切，可惜眼闊肚窄，唯有下次留肚試吓其他款式。