阿木台灣麵 (D2 Place TWO)

Open Now

Now Closed

工作關係經常出入荔枝角，但比較少去D2 place食嘢，原因青山道嗰頭都幾多好嘢食，D2 place又成日人山人海，食嘢好難揾位。上週末有個住四小龍的朋友問我有無食過阿木，未試過一定要試下，仲揾埋位同我食。入到去真係超多人，我地三個人，叫左三個主食，兩個friends一個叫左鹽酥雞套餐配麻醬拌麵，另一個食台灣腸便當配肉臊飯，我就唔想食咁多白飯，又唔想食炸嘢，見到隔離枱個番茄牛肉麵賣相好得就叫左。我碗麵湯底好濃郁，飲得出係用蕃茄煮出嚟，唔似得有啲拉麵鋪加茄醬茄膏就算，牛肉都煮得幾淋，唔會好難咬。食物份量真係幾多下，麵條食淨少少，但個湯就比我飲晒！另外值得一贊係佢個肉鬆芝士蛋餅，芝士加肉鬆原來好夾，呢個蛋餅都幾飽肚，要三個人先食得晒。另外朋友個鹽酥雞同台灣腸我都試左少少，兩樣都係好地道台灣小食，疫情後都無去過台灣，好掛住啲台灣嘢食，好彩而家喺呢間都可以食到台灣夜市小食風味。