老媽拌麵 (將軍澳中心)

Open Now

Now Closed

真係好懷念去台灣旅行既時候，日日都可以食好西，尤其係好味嘅牛肉麵、拌麵，好彩唔少台灣過江龍都嚟香港開店，就好似呢間老媽拌麵咁，去唔到台灣都可以止下癮。同朋友嗌咗個地獄麻辣牛肉拌麵同麻辣老鍋麵、滷鴨舌同牛腱、百香果國寶茶。地獄牛肉辣味好勁，食落好刺激，牛肉有彈性，麵就嗌左幼麵，好掛汁之餘，麵質彈牙有口感，好香滑。而麻辣老鍋麵就好香藥材味，反而無拌麵咁辣，湯底香濃，入面更有唔少材料，例如鴨血、肥牛、響鈴，最特別嘅係黑色豬肉丸，都幾少見，而且咬落好多汁好香口，粗麵煙韌爽口，連埋湯食好夾。另外仲嗌咗個滷鴨舌同牛腱，食落好入味，鴨舌好嫩滑，牛腱亦都好有肉味，唔會太硬。食完辣野就要飲啲嘢，呢個百香國寶茶，飲落酸酸甜甜好清新，好解渴。 價錢嚟講都OK，食物份量剛好，而且質素唔錯，可以再食。