犀牛犀牛 (Wetland Seasons Park) (Closed)

話說最近禁堂食夜晚無得出去食，天氣又好凍唔想自己煮，唯有係嗌外賣啦~ 天水圍嗌外賣又有咩好選擇呢？男友喺美食平台度發掘到間新開張嘅台灣過江龍食店「犀牛犀牛」，主打台式蛋餅同吐司，感覺好似唔錯，所以決定嗌嚟試下~ 其實呢間「犀牛犀牛」唔止天水圍有，沙田、中環、大角咀、香港仔都各有分店，想試嘅朋友仔都可以搵返方便就腳嗰間試~ 🧡捲餅套餐（$102）🔸韓式醬燒牛五花捲餅捲餅送到過嚟都仲係熱辣辣~餅皮微脆乾身，好重蛋香，入面包咗好多牛肉餡，份量十足，牛肉食落新鮮，調味恰到好處，正！ 🔸芋泥生菜沙律芋泥配生菜沙律呢個配搭都幾特別，食落都幾夾，健康又好味！🔸香脆薯波薯波送到過嚟都仲係好脆，外脆內軟，好香口！🔸凍伯爵歐蕾伯爵歐蕾個人就麻麻地好，偏甜！ 🧡花生醬培根起司蛋餅（$38）花生醬、培根、起司呢個配搭都好正，整體偏鹹香，但味道層次豐富，好食！整體來講，CP值好高，本身價錢都唔算貴，仲額外有75折！咁多野食折完之後先至$105，真係好抵食~推介推介！