鼎王麻辣鍋 (The LOHAS) (Closed)

台灣過江龍大約6:30入座餐廳已經坐咗一半，侍應服務態度真係非常好！我地未食過嘅關係，侍應為我地講解湯底，湯底係每位計，麻辣湯底裡面的鴨血和豆腐係無限任refill；酸菜白肉湯底的酸菜也是無限任refill。我地叫咗雙併湯底，其間店員每隔一陣就主動問我地要唔要refill鴨血豆腐或酸菜，非常貼心。兩個湯底我最愛麻辣鍋，飲一啖就知咩叫真材實料，除咗有麻辣味，仲有好香的花椒味，嗰種辣唔係一味辣死人，而係辣得嚟香氣會迴盪口中。食到一半覺得唔夠辣，仲可以叫店員加辣湯𠻹。酸菜白肉比較清淡，白肉份量不多，酸菜清甜開胃，食多啲都唔會濟。配料我地叫咗老油條、羊肉卷、竹笙同埋新竹米粉。由於鴨血可以不停任refill，我地食咗好多轉；雖然係任fill,但質素絕對高質，鴨血預先煮好索滿麻辣湯汁味，入口滑溜夠嫩，唔會一夾就散。豆腐仲正，索晒汁咁食，裡面好軟滑，食一件就會停唔到口。老油條係台灣直送，口感比起香港嘅油炸鬼實啲，口感再豐富啲。完全無油溢味👍🏻建議浸落湯耐少少，等整嚿老油條浸滿汁先食。整體嚟講今餐好滿意，有90分👏🏻