古早牛肉麵 (Closed)

今晚同細妹出深水埗，突然口痕想食台灣野，行行吓見到間古早味牛肉麵，於是我哋諗都唔諗就諗住入去試吓啦。我哋兩個其實都唔算太肚餓，主要係有啲口痕想食啲小食，所以我哋叫咗碗細雞肉飯、海苔炸雞扒同朱古力珍珠奶茶。等菜到嘅期間我四圍望一望間餐廳，發現間餐廳嘅裝修都好有舊年代台灣嘅風味，我都忍唔住影咗幾張相，唔講以為自己去咗台灣添啊。啲嘢食話咁快就嚟咗，個雞扒外脆內嫩，而且都好大塊好好食，碗雞肉飯細細碗但係都好飽肚，連埋少少雞油真係好惹味。朱古力珍珠奶茶意外地都好大杯，一個人飲都真係幾飽，飲得出佢係用咗可可粉去沖嘅，啱啱好中和返珍珠奶茶嘅甜味，我本身就唔係太鍾意過甜嘅珍珠奶茶，今次嗌左呢個微糖嘅朱古力珍珠奶茶，甜到就真係啱啱好啦。珍珠都好大粒好Q軟，美中不足嘅地方就係太少珍珠啦，好想再咬多啲珍珠。