幸福班戟 (K11 Musea) (Closed)

日本pancake已經喺香港風靡咗一段好長嘅時間，每次有新舖頭開，都會出現好長嘅人龍、好難嘅訂枱同埋好多人嘅討論。雖然我都係一個pancake嘅粉絲，但係因為我唔鍾意排隊，所以通常我會等熱潮過咗之後先至去試。 好耐之前我已經想去食幸福班戟，嗰陣時只有銅鑼灣一間分店，而且網上訂枱有唔少限制，所以一直都未有機會食到。 早排我發現尖沙咀有分店，我諗隔咗咁耐又有咁多其他品牌嘅日本班戟， 應該少啲人排掛，我專登揀比較早嘅時間去，即係大概早餐至午餐之間嘅時間，雖然都要等但係我大概等咗一個字就入得。 估唔到咁早已經有咁多人嚟食班戟! 入到去，可能係新開啦，覺得間舖都幾靚幾舒服，好啱女仔嘅style。我點咗個朱古力香蕉班戟， 佢係即叫即整嘅，所以都要畀啲時間等佢製作。班戟賣相都ok嘅，但係因為佢係用個紙盤裝住，所以一定冇擺喺個靚碟影咁好睇。 食落口班戟都算鬆軟，但係個蛋香味唔夠，真係有啲失望，因為蛋香味係我心目中係好食嘅班戟一個好重要嘅元素。而朱古力香蕉忌廉都係咁啦，正正常常。整體嚟講味道ok嘅，不過唔算好好食，好彩唔使排咁耐，當小食咁食下都ok嘅，但如果排咁耐咁樣嘅味道一定會失望啦。