爺爺雞煲皇 (Closed)

或許跟很多人不同，筆者打邊邊食雞煲，係無分季節的，春夏秋冬都可以烚下烚下。食雞煲仲有一個好處，就係可以邊食邊等，尤其是遇著我呢啲經常放唔到工的麻煩人。又遲到，萬分抱歉，還要謝謝甜魔媽媽Yan借出既靚相。趕到來，好肚餓，先吃些唔使等的金磚脆豆腐，香口的東西永遠合我心，即使是放涼了，依然唔差。可以想像，熱呼呼放入口時，是多麼的正斗。事不宜遲，要向雞煲進攻。我不知道大家柯打的是什麼辣度，但於我的角度看，這應該是小辣，不算太刺激，還滲出微甜的味道，個人頗喜歡，當然雞件嫩滑，也是討好的地方。在嚐雞件之同時，大家早前放入去的丸子，已經可以食了。看得出是手打，牛丸肉味頗濃，蝦肉都合格，仲有比較少機會試到的鯪魚丸，挺特別。我呢個正義既人，一定會將邪惡既東西消滅，什麼鵝腸呀，豬大腸呀，統統同我走出來。這次，我會較喜歡對付爽脆多脂的鵝腸，實在太邪惡啦！在香港地，打邊爐食雞煲，豈能沒有靚牛呢?! 來了碟雙拼，分別是本地手切肥牛，同埋牛頸脊，單是其雪花紋理，已說明一切。總之，兩者各有千秋，三兩下手勢就被我吃清光。一碟牛是滿足不了食肉獸的，加份鬆化的牛腩片，就差唔多。怕不夠飽，再一碟雲吞，每人整幾粒，夠晒飽肚。