龍門冰室 (Closed)

去開屯門龍門居買嘢，原來嗰邊都好多嘢食，lunch 時間去到見到龍門冰室無乜人等位，於是入去食個午餐。餐牌選擇多不勝數，又想食吉列魚，又想食吉列豬，於是同朋友一人一個餐，黑椒吉列魚柳拼流心奄列意粉，同埋秘製咖哩厚切吉列豬柳意粉，凍奶茶及凍檸檬茶。黑椒吉列魚柳拼流心奄列意粉吉列魚柳厚身，魚肉雪白夠juicy，黑椒汁似洋蔥汁加黑椒，唔會好似出邊啲餐廳咁辣，流心奄列有洋蔥和磨菇，口感豐富，意粉唔會太淋好食。秘製咖哩厚切吉列豬柳意粉吉列豬柳比魚柳略為炸得過火，好彩豬柳肉質夠淋，配咖哩汁味道吸引，秘製咖哩汁如果餸白飯相信可以食得更多。