吉吉點 (Closed)

好耐之前已經想試吉吉點的點心，今日終於有機會經過附近，當然要同朋友去試下啦。吉吉點的坐位唔多，好彩都唔洗等好耐就可以入坐，坐位有D逼，但都算企理的。燒汁煙鴨胸腸粉 - 腸粉好滑，燒汁煙鴨胸配落感覺新鮮，但好似其他款式的腸粉更吸引。青芥末鯪魚球 - 其實個鯪魚球就係普普通通，但個醬係類似沙律醬加上青芥末的味道，配搭起來出奇地好味。古法馬拉糕 - 其實係食左一半先記得影，分量係正常酒樓分量，而且夠鬆軟好味。千層珍珠雞 - 一籠有兩隻珍珠雞，雖然唔係好大隻，但真材實料，食落啖啖肉，味道都唔錯。千層薑汁糕 - 食完點心都未夠喉，叫多左個千層薑汁糕，熱食真係一流，夠薑味但又唔會太辣，推薦之選。整體而言，點心水平比現時酒樓好，茶位又唔算貴($5 位)，仲要免加一，真係可以再來試埋其他點心。