囍宴 廚‧藝 (Closed)

想試囍宴好耐，今日終於同成班同事,一行九人在此午飯。這店午市提供四至五人同八至十人商務套餐，價錢貴少少，平均一個人大約$160至$180。另外還有一人餐,價錢$88,茶芥連加一承惠$107。九個人叫了九個一人餐，套餐有涼拌泡菜、例湯、時蔬、飯、自選主菜一道同甜品，有些餸菜叫了雙份，初初以爲一人餐會少得可憐，但又唔係喎，餸菜份量尚算足夠，食過後，覺得味道幾好,價錢合理，路過此店，值得一試。口水雞，辣汁另上，加多加少，純粹個人喜好，此點做得細心，雞肉嫩滑，個汁惹味，好正。香酥九製陳皮骨，炸得香口脆身唔油膩，少少陳皮味，味道ok，但略嫌粉漿太厚，似食麵粉粒多些。鮑汁香酥糯米鴨，鴨肉同糯米唔會炸得過乾，整體鬆化，口感豐富幾好味。梅菜扣肉，豬肉炆得腍滑鬆化又入味，略嫌梅菜鹹咗少少，淡番些會更好。荔枝菠蘿火鴨紅咖哩，鴨肉嚡口，味道偏鹹，唔係好鍾意。仁稔麵豉醬陳村粉蒸排骨，排骨蒸得軟腍入味，又唔會過鹹，配陳村粉同食，味道ok。豆腐雪糕，自家製甜品，可惜豆味唔濃，味道過甜，整體嘛嘛。