泰色食 (Closed)

餐廳名同裝修都係泰國餐廳。不過除左泰式仲有台式野食揀。叫左海南雞飯。送湯同野飲。湯係椰子雞腳湯。有好香椰子味。飲落唔似味精湯。海南雞去左骨。叫完唔駛5分鐘就上枱。應該一早整定。不過啲雞骨去唔清。有幾件雞仲食到骨。雞冇乜雞味。不過雞胸肉都唔會鞋。肉量足。油飯有色有味不過唔太香。餐飲揀左冷泡茶。係菊花杞子茶。似係自家製。有淡淡菊花味。小店似係家庭式作業。店員風趣有禮。$60有湯有飯有野飲。價錢屬同區抵食之選。